Illersornissaqarfik Canadamiunit aqunne-qartumi, Issittumi peqatigiillutik iller-suinermik sungiusaqatigiinnermi angisuumi, sungiusarpoq
Maannakkorpiaq qallunaat illersornissaqarfiat immikkoortortat frankrigimeersut aamma USA-meersut peqatigalugit canadamiunit aqunneqartumi Nanook Tuugaalik-mmik taaneqartumi sungiusaqataapput. Sungiusarneq canadap kalaallit nunaatalu imartaani ingerlanneqarput, Illersornissaqarfimmullu sungiusarnernut immikkuullarissunut peqataanissamut periarfissiilluni.
Foto: Assiliisoq: Illersornissaqarfik
Illersornissaqarfimmit
Sap.-ak. marlunni danskit umiarsuaat alapernaarsuut Thetis-imi inuttat canadarmiut ukiumoortumik imartaani sungiusartarneranut angisuumut, Nanook Tuugaalik taaneqartumi peqataasimapput. Canadarmiut illersornissaqarfiata Issittup imartaani sungiusarnerisa annerpaartarivaat.
Iligisat Canadamiit, Frankrigimiit aamma USA-miit peqatigalugit, assigiinngitsunik ingerlataqarnikkut inuttat sungiusarnermi immikkuullarissunik piginnaasanik pisariaqartunik nukittorsaanissaminnut periarfissinneqarput.
Nunat assigiinngitsut akornanni Issittumi upalungaarsimaniarnermi pingaaruteqarluinnartumi suliaqarsinnaanermi suleqatigiissinnaaneq sungiusarneqarpoq. Suliassaqarfimmimi nunarsuarmi unamminartortaqarsinnaaqisumi angeqisumilu, Europamiit marloriaammik annerusumi, sumi isumalluutinik, ilisimaarinninnermik aamma misilittakkanik avitseqatigiinnissaq pineqartillugu, pingaaruteqarluinnartuuvoq ataatsimut najuunnissaq.
Taamaattumik sungiusarnerit Nanook Tuugaalik-ttut ittut nunamut ataatsimut pingaaruteqarput aammali NATO-mi nunat assigiinngitsut ataatsimut nukittussusaannik takutitsiisinnaanermut aamma Issittumi suliaqarsinnaanerinut piginnaasaqarsinnaanerinullu pingaaruteqarlutik.
”Sungiusarneq issittumi pissutsit immikkuullarissut ataanni suliakkerneqartartut assigiinngitsut suleqatigiissinnaanerinut sungiusaqatigiissinnaanerinillu periarfissiilluarpoq. Danskit nunallu assigiingitsut akornanni isumalluutissat Kalaallit Nunaata nalaani qanimut suleqatigiinnermik sungiusaqatigiinnitsinni suliaqarsinnaanerput, upalungaarsimaniarnermi piginnaasagut aamma ataatsimut Issittumi unammillernartut pillugit paasisimasaqarnerulersinnaavugut nukittorsaallutalu. Piffissami massumani immikkut pingaaruteqarpoq pissutigalugu Issittumi isumannaallisaaneq ataatsimoorluni suliassaammat,” generalmajori Søren Andersen, Issittumi Sakkutooqarfimmi pisortaq oqarpoq.
Assiliisoq: Illersornissaqarfik
Iligiit annerusumik Issittumiinnerat
Sungiusarneq Nanook Tuugaalik piffissami NATOp annerusumik suliaqarfimmiinnissaata ukkatarineqarnerata nalaani ingerlanneqarpoq aamma Issittumi suliaqarsinnaanerata sumiiffiullu pissaaneqarniarluni soqutiginninnerup alliartornerani nunarsuarmilu silap allanngoriartornerata kingunerisai pissutigalugit ataatsimoorluni illersuisinnaanermik malitsigisaattut ingerlanneqarluni.
Ukiup ingerlanerani NATO-mi suliaq Arctic Sentry-mik, Joint Force Command Norfolk ataani inissitamik, pilersitsinermik kinguneqarpoq taannalu iligiit tapersiinerinik ataqatigiissaarilluni.
Canadami nunap 40 %-risaa aamma sineriaata 70 %-risaa issittup nalaaniippoq taamaattumik annerusumik ukkatarinninneq malugineqarsinnaalluarpoq. Taamaattumik nunat iligisat soorlu Danmarkip peqataanera aamma ataatsimut suliaqarneq pingaartinneqarpoq.
” Tuugaalik-mmi peqataaneq umiarsuaatitsinnut, inuttanut aamma iligisatsinnut pineqarpoq piffissamik pingaaruteqarfiunerpaaffiusumik atuinissaq: imaani, Issittumi, sumiiffimmi imaanilu suliaqarnermi ilisimaarinninnerulernissaq attatiinnarniarneralu annerulersinniarlugu sungiusaqatigiinneq. Suliaqarfiusuni nakkutilliinitsinni suliaqarfiup nalaani paasinninnerulertarpugut aamma pisinnaasatsinnik ilisimaarinninnerulertarluta, taamatuttaaq sumiiffimmi innuttaasut suleqatillu Avannaamioqatigiit akorngini immitsinnut ilisarisimaqatigiinnerulertarluta,” kommandøri Brian Henwood, HMCS Robert Hampton Gray-imi aamma Task Force Commander-imi naalagaanertaq oqarpoq.
Sap.-ak. siulliit marluk Nanook Tuugaalik canadamiut akisussaaffiata nalaani ingerlanneqassaaq, kingornalu sungiusarnerup naammassinera kalaallit nunaata imartaani sungiusarnerup ingerlannera Issittumi Sakkutooqarfiup akisussaaffigivaa.
Sungiusarnerup naammassinerani umiarsuit Nuup umiarsualivianut tulassapput kingornalu umiarsuit ilai tamanut ammatitsissallutik.
Paasissutissat: Nanook Tuugaalik
- Suliaqarneq Nanook canadap illersornissaqarfiata Issittumi ilisarnaatimittut suliaqarfigisarivaat, taannalu assigiinngitsunik suliassaqarfinnik ukkataqarpoq soorlu ataatsimut sunniuteqarnermik, peqatigiiaarnermik aamma sakkutooqatigiit/immikkoortortat, oqartussaasut nunallu assigiinngitsut suleqatigiissinnaanerinik imaqarluni.
- Nanook Tuugaalik tassaavoq imarsiortunik aqunneqartumik suliaqarneq, ingerlanneqarneralu ilaatigut nakkutilliinermik aamma iligisat isumaqatigiissuteqaqatillu peqatigalugit nunami naalagaaffeqarfiup innarlerneqannginnissaanik ingerlataqarneq.
- Nanook Tuugaalik ukioq manna Canadamiit, Danmarkimiit, Frankrigimiit aamma USA-miit sakkutuunik imarsiortunit aamma sinerissami alapernaarsuisunit peqataaffigineqarpoq.
- Kalaallit nunaata imartaani sungiusarnerup ilagissavaa imaani annaassiniarneq, mingutsitsinermi upalungaarsimaniarneq, aalisartunik nakkutilliineq, atortulersuutinik attaveqaatinillu pingaaruteqartunik paarsineq aamma umiarsuarnik piffimmiittussaanngitsunik qimagutsitsinermi suliaqarnermik ingerlatsineq.
- Sungiusarneq Halifax-miit avalannikkut aallartinneqarpoq sap.-ak. marluk siulliillu canadap imartaani ingerlanneqarluni, kingorna sungiusarnerup sinnera kalaallit nunaata imartaani ingerlanneqassaaq Nuummilu umiarsualivimmut tulannikkut naaneqassalluni.